Preocupación polo futuro de Sargadelos
A decisión de pechar a fábrica de Sargadelos en Cervo, anunciada polo administrador único da empresa, Segismundo García, provocou unha onda de preocupación en Galicia. Tanto desde a Deputación de Lugo como desde o Bloque Nacionalista Galego esixen ao Goberno galego que interveña para evitar o cesamento da actividade dunha das marcas máis emblemáticas do país.
Un peche que podería ser ilegal
O presidente da Deputación de Lugo, José Tomé Roca, expresou o seu rexeitamento a esta medida e advertiu que "non pode haber un peche patronal sen autorización da autoridade laboral". Lembrou que para que Sargadelos cese a súa actividade debería presentar un Expediente de Regulación de Emprego (ERE) extintivo, o cal debe ser aprobado pola Xunta de Galicia ou, no seu defecto, acreditar perdas económicas durante varios anos consecutivos.
Tomé suxeriu que esta decisión podería ser unha "manobra de presión do propietario fronte á Xunta" e instou ao Goberno galego a actuar con contundencia. "Espero que a Xunta estea á altura das circunstancias e non permita o peche, porque o peche patronal está prohibido por lei", subliñou. O mandatario provincial insistiu en que Sargadelos "é moito máis que unha empresa", pois representa un patrimonio industrial e cultural "de todos os lucenses e de todos os galegos". Por este motivo, considera urxente atopar unha solución que garanta a continuidade da actividade e dos postos de traballo.
Ademais, referiuse ás 36 deficiencias detectadas pola Inspección de Traballo, cualificándoas como "moitas" e advertindo de que poderían derivar en responsabilidades xudiciais para a dirección da empresa. A Deputación de Lugo comprometeuse a seguir de preto a evolución da situación e fixo un chamamento á responsabilidade de todas as partes implicadas para evitar a perda dun símbolo histórico e económico para a provincia e para Galicia.
O BNG esixe a intervención inmediata da Xunta
Desde o BNG, a viceportavoz Olalla Rodil tamén reclamou unha resposta inmediata do Goberno galego para impedir o peche de Sargadelos, ao que definiu como un "auténtico emblema deste país". A nacionalista advertiu que a desaparición da fábrica de Cervo suporía a perda de centos de postos de traballo, ademais dunha parte fundamental do patrimonio material e inmaterial de Galicia.
Rodil lembrou que Sargadelos, ademais dos seus centros de produción en Cervo e Sada, garda un legado cultural e artístico de incalculable valor, desde os seus edificios declarados Ben de Interese Cultural ata a obra de figuras como Isaac Díaz Pardo e Luis Seoane, impulsores do proxecto moderno da marca. "Estamos a falar dun auténtico símbolo nacional de Galicia", afirmou.
Por este motivo, instou á Xunta a "non permanecer impasible" e a tomar medidas urxentes para evitar o peche e garantir tanto a continuidade da produción como a conservación do patrimonio histórico que representa Sargadelos. A deputada avanzou que o BNG presentará iniciativas no Parlamento galego co obxectivo de buscar solucións que aseguren o futuro da emblemática fábrica.
O peche de Sargadelos en Cervo non é só unha cuestión laboral, senón que pon en risco unha das marcas máis recoñecidas dentro e fóra de Galicia. Mentres medra a preocupación entre traballadores e institucións, todas as miradas están postas agora na resposta da Xunta de Galicia.
O BNG de Cervo denuncia a decisión e chama á mobilización
Desde o BNG de Cervo manifestaron a súa "máis absoluta condena" ante o anuncio de peche da fábrica, cualificándoo como un "golpe demoledor" para a comarca da Mariña e para toda Galicia. "Sargadelos non é só unha empresa; é un símbolo da identidade galega, cunha historia de décadas de loita e innovación, e coa capacidade de xerar emprego e dinamizar a economía local", sinalaron.
O portavoz do BNG en Cervo, Diego Fernández, subliñou que o partido estará "do lado dos traballadores" e loitará para impedir que se leve a cabo esta decisión. "O BNG quere expresar o seu apoio total e absoluto aos traballadores de Sargadelos. Non podemos permitir que se peche unha fábrica que representa o noso pasado, presente e futuro. Levarémos ao pleno do Concello iniciativas para protexer a continuidade de Sargadelos e reclamaremos accións concretas por parte da Xunta para garantir a viabilidade do proxecto", asegurou.
Ademais, denunciou a "pasividade" do Partido Popular, ao que acusou de permitir que empresarios como Segismundo García "actúen con total impunidade, destruíndo empregos e tecido industrial sen ningunha resposta por parte das administracións". Para Fernández, esta situación demostra unha vez máis que o PP "non defende os intereses da veciñanza, senón que permite a especulación e o abandono do noso patrimonio industrial".
Desde o BNG comprometéronse a impulsar todas as accións necesarias para evitar o peche da fábrica e chamaron á mobilización social en defensa de Sargadelos, da súa historia e do seu futuro.
O peche de Sargadelos en Cervo non é só unha cuestión laboral, senón que pon en risco unha das marcas máis recoñecidas dentro e fóra de Galicia. Mentres medra a preocupación entre traballadores e institucións, todas as miradas están postas agora na resposta da Xunta de Galicia.