Portos de Galicia e a Axencia Tributaria reforzan a súa colaboración con novos acordos en Ribadeo
O presidente de Portos de Galicia, José Antonio Álvarez, e o delegado especial da Axencia Estatal de Administración Tributaria (AEAT) en Galicia, Miguel Cárcaba, mantiveron unha reunión de traballo na sede do ente público na Coruña. O encontro serviu para afondar nas vías de cooperación entre ambas institucións, cun enfoque centrado na optimización dos recursos portuarios e o fortalecemento da actividade de vixilancia marítima na comunidade.
Entre os principais asuntos abordados, destacou a activación do convenio de cesión de instalacións de Portos de Galicia á AEAT no porto de Ribadeo, un acordo que permitirá o uso das infraestruturas portuarias por parte do servizo de Vixilancia Aduaneira. O convenio recolle a cesión dun peirao flotante, unha caseta de apoio en terra e unha zona restrinxida de aparcadoiro, todo iso sen imposición de taxas polo ente público.
Esta colaboración, que terá unha vixencia inicial de 15 anos prorrogables, busca mellorar a operatividade das unidades marítimas da Axencia Tributaria na costa lucense e facilitar o seu traballo de control fronteirizo e prevención de actividades ilícitas no mar.
Con estas medidas, Portos de Galicia reafirma o seu compromiso coa colaboración institucional e coa mellora da seguridade marítima, apoiando á Administración Xeral do Estado nas tarefas que desenvolve dentro das súas competencias. “A coordinación entre administracións é fundamental para garantir un uso eficaz e responsable das infraestruturas portuarias galegas”, sinalaron fontes do ente público tras o encontro.
A cooperación entre Portos de Galicia e a AEAT reforza así a súa aposta pola eficiencia, o servizo público e a protección dos intereses marítimos da comunidade, consolidando a rede portuaria galega como un elemento esencial de apoio ás misións de vixilancia e control no litoral.