Portos de Galicia acometerá a segunda fase de reparación do porto do Vicedo
Portos de Galicia iniciará antes de que remate marzo a segunda fase das obras de reparación do porto do Vicedo, dando continuidade ás actuacións iniciadas o pasado ano para estabilizar o peirao da lonxa.
Na primeira fase levouse a cabo a consolidación da banqueta do porto, que sufrira unha perda de material na súa base, provocando a apertura dunha fenda na superficie. Ademais, realizáronse melloras complementarias, como a reparación das pezas metálicas laterais de protección, moi afectadas pola acción do mar.
Nesta segunda fase, procederase á pavimentación da superficie portuaria e á reparación dunha parte da vía de entrada ao porto. Paralelamente, tamén se está realizando un control topográfico para avaliar a evolución das intervencións previas e garantir que o peirao está completamente asentado.