Por Viveiro solicita melloras na Avenida de Ferrol e na contorna da igrexa de San Francisco
Manuel Galdo Dopico, concelleiro do Grupo Municipal Por Viveiro, presentou dous rogos ao Pleno da Corporación Municipal de Viveiro instando ao equipo de Goberno a actuar en dúas zonas clave do municipio.
O primeiro rogo fai referencia ao mal estado da beirarrúa da Avenida de Ferrol, á altura do edificio Ría de Viveiro. O edil subliñou que a presenza de fochancas e lousas rotas pode supoñer un risco para a seguridade dos peóns que transitan por esa área diariamente, polo que solicitou a reparación urxente desta infraestrutura.
Ademais, Galdo Dopico tamén fixo un chamamento á limpeza e mellora da contorna da igrexa de San Francisco, concretamente na zona colindante co Cantiño Lois Tobío, onde a maleza invade parte das fachadas. Este feito, segundo o concelleiro, ofrece unha imaxe de desleixo e abandono, polo que pediu que se tomen as medidas necesarias para arranxar esta situación.
Ambas peticións pretenden mellorar a seguridade e a estética urbana de Viveiro, atendendo ás demandas veciñais e ao bo mantemento do espazo público.