Por Viveiro e PP avanzan cara a unha alternativa de goberno
A primeira reunión entre Por Viveiro e o Partido Popular celebrouse onte, cun balance positivo de cara á posible formación dun goberno alternativo ao actual executivo municipal. Durante o encontro, as dúas formacións trataron cuestións programáticas nas que coincidiron na súa maioría, o que levou á convocatoria dunha nova reunión para o mércores 19 de febreiro.
A voceira do PP, Mariña Gueimunde, afirmou que "a decisión que tomemos non pasará do mércores" e subliñou que "hai posibilidades" de chegar a un acordo.
Gueimunde tamén resaltou que os proxectos tratados e as perspectivas de goberno "van máis alá dos dous anos, xa que son temas prioritarios para Viveiro e teñen un horizonte a longo prazo".
Cabe lembrar que, en xullo de 2023, Por Viveiro apoiou a investidura da socialista María Loureiro como alcaldesa, condicionada ao cumprimento dun acordo que incluía diversos investimentos a realizar nun prazo de dous anos. Este apoio permitiu a constitución do actual goberno bipartito (PSOE-BNG). Con todo, en decembro pasado, o partido liderado por Bernardo Fraga anunciou que retiraba o seu respaldo, xa que, pasados ano e medio desde o inicio do mandato, apenas se produciron avances nin investimentos significativos.