Por Nuestro Faro denuncia a opacidade sobre o futuro da Illa Pancha e recorre á Valedora do Pobo
A asociación veciñal Por Nuestro Faro deu un novo paso na súa loita por obter información sobre o futuro da Illa Pancha, en Ribadeo, e acaba de presentar queixas formais diante da Valedora do Pobo de Galicia e da Comisión de Transparencia da comunidade. A entidade reclama que se respecte o dereito á información da cidadanía e que se aclare se a concesión que permite a explotación privada do illote —concedida en 2015 e vixente ata o 30 de xuño de 2025— será prorrogada sen que se teña en conta o necesario Estudo de Impacto Ambiental.
Segundo explican desde a asociación, o pasado mes de marzo dirixíronse á Autoridade Portuaria de Ferrol-San Cibrao para interesarse pola situación administrativa da concesión. A petición, centrada en dous puntos concretos —se existía solicitude de prórroga e se se ía esixir o correspondente informe ambiental—, quedou sen resposta. Esa falta de contestación levou ao colectivo a recorrer a organismos garantes da transparencia institucional.
Ao abeiro da Lei 19/2013 de transparencia, Por Nuestro Faro solicitou á Valedora do Pobo a apertura dun expediente que obrigue a Autoridade Portuaria a responder e, ao mesmo tempo, remitiu unha denuncia á Comisión de Transparencia de Galicia polo mesmo motivo. En ambos casos, insisten na relevancia ambiental da Illa Pancha, situada nun espazo protexido pola Rede Natura 2000, e lembran que tanto Portos como a Consellería de Medio Ambiente xa recoñeceran no seu momento a necesidade de avaliar os impactos da actividade.
A asociación considera que, de cara á posible prórroga da concesión, as autoridades competentes deberían non só esixir un Estudo de Impacto Ambiental senón incluso suspender a concesión por un “incumprimento reiterado” da lexislación europea, estatal e autonómica en materia de protección ambiental e de uso do dominio público.
“Levamos unha década reclamando acceso á información e denunciando as irregularidades deste proceso”, sinalan desde Por Nuestro Faro. Tamén mostran a súa perplexidade pola actitude do actual alcalde de Ribadeo, ao que reprochan “evasivas constantes” e a “ausencia total de información pública” sobre o futuro do enclave.
“Resulta desconcertante que desde o Concello non se transmita nada á veciñanza sobre un lugar tan simbólico e valioso desde o punto de vista natural, patrimonial e identitario como é a Illa Pancha”, critican. E engaden que, malia os diferentes gobernos locais, a asociación leva dez anos actuando en solitario para que se cumpra a legalidade.
