Piñeirua e Pepe, do CD Foz, liderarán o equipo xuvenil do Real Tapia CF

Os adestradores deixan o CD Foz para iniciar unha nova etapa no club asturiano a partir de setembro

O fútbol xuvenil do Real Tapia CF contará esta tempada cunha nova dirección técnica. Piñeirua e Pepe, que ata o de agora formaban o equipo de adestradores do CD Foz na categoría cadete, asumirán o reto de liderar ao equipo xuvenil tapiego a partir do mes de setembro. “Mudamos de equipo por cambiar de aires”, sinalaron ambos técnicos, satisfeitos co novo proxecto deportivo que teñen por diante.

No novo destino, Piñeirua asumirá o papel de primeiro adestrador, mentres que Pepe exercerá como segundo técnico e delegado de campo, formando un tándem que xa comezou a traballar co grupo. “Xa estivemos co novo equipo e comezaremos en setembro para preparar o inicio da liga en Asturias”, explicaron.

Desde o Real Tapia CF amosaron a súa confianza na experiencia e dedicación do novo corpo técnico, co obxectivo de reforzar a formación dos xogadores e mellorar o rendemento do equipo xuvenil nesta nova tempada.