Pensionistas convocan unha nova concentración en defensa da atención primaria
A Federación de Pensionistas e Xubilados de CCOO de Galicia (FPX-CCOO) convoca novas concentracións en defensa dunha atención primaria de calidade e accesible ás persoas maiores, na liña dos actos de protesta que o sindicato protagonizou a finais de outubro
Esta será en Celeiro ás 12.00 horas diante da Xefatura Territorial da Consellaría do Mar e nela reclamarán a reversión dos recortes que lastraron durante os últimos anos "a principal porta de acceso á sanidade pública" e esixen medidas para que sexa máis accesible para as persoas maiores, "que non sempre teñen medios ou capacidades para as xestións telemáticas".
Entre outras medidas, a FPX-CCOO pide o aumento do orzamento destinado á sanidade pública, paralizar o peche de centros e a reapertura dos que foron pechados, recuperar a accesibilidade e a atención presencial, restablecer a capacidade dos centros de saúde (respectando os protocolos covid) ou reforzar a atención primaria con novas categorías profesionais para descargar a medicina de familia.
No marco desta nova xeira de concentracións xa houbo unha protesta o pasado xoves, día 4, en Vigo. Para a semana que vén están previstas concentracións os días 8 e 9 de novembro noutras cidades e vilas galegas, conforme o calendario que se indica a seguir: