Ourol celebra a V Xuntanza de Mulleres cunha comida-baile polo 8 de Marzo
O Concello de Ourol celebrará o vindeiro sábado 8 de marzo a V Xuntanza de Mulleres, unha cita xa consolidada que busca crear un espazo de encontro no que compartir experiencias, fortalecer vínculos e poñer en valor os avances acadados na loita pola igualdade, sen esquecer os retos que aínda quedan por diante.
A iniciativa, promovida polo Departamento de Servizos Sociais, desenvolverase arredor dunha comida-baile que combinará convivencia, conversa e lecer nun ambiente de compañeirismo e apoio mutuo. A xornada está concibida como un momento para brindar polos logros conseguidos ao longo dos anos e, ao mesmo tempo, para continuar reclamando de maneira colectiva unha igualdade real e efectiva.
O encontro terá lugar no Restaurante Louzao, en Viveiro, a partir das 14.00 horas, e contará cun menú completo e cun custo de 35 euros por persoa. Ademais da comida e do baile, a xornada incluirá diferentes sorpresas pensadas para facer da celebración un día especial.
As entradas poden recollerse no Departamento de Servizos Sociais do Concello de Ourol ata o vindeiro 4 de marzo. Desde a organización animan a todas as mulleres a participar nesta xuntanza, pensada para compartir, celebrar e seguir avanzando xuntas.