Osa do Mar 2026 anuncia as primeiras confirmacións e fixa datas en setembro en Burela
O festival Osa do Mar regresará a Burela os días 4, 5 e 6 de setembro de 2026 cunha nova edición que comeza xa a coller forma tras facerse públicas as primeiras confirmacións do seu cartel. A cita musical, xa consolidada no calendario cultural galego, volve apostar por unha programación diversa e cun marcado carácter propio, combinando propostas recoñecidas con proxectos emerxentes.
Entre os primeiros nomes anunciados figura Depedro, un dos artistas máis destacados do panorama estatal, coñecido pola súa capacidade para conectar co público a través dun son persoal e recoñecible. Xunto a el estarán tamén West SRK e XMaseda65, dous proxectos que reforzan a variedade estilística dunha programación pensada para públicos moi diferentes.
O cartel complétase, nesta primeira avanzada, con Éxtasis, unha formación da que desde a organización destacan que se trata de “tres amigos da gardería que seguro que o petarán no 2026”, subliñando así o seu carácter fresco e a proxección que se lle augura. Tamén se suma Juventude, definidos polos responsables do festival como os “reis do groove, os sevillanos que non vos podedes perder”, unha aposta clara polo ritmo e a enerxía sobre o escenario.
Ademais destas primeiras confirmacións, o festival anunciou tamén a presenza de La Milagrosa, unha das propostas máis irreverentes do panorama actual, que desde a organización aseguran que “porán a Praza do Concello de Burela patas arriba” coa súa posta en escena directa e sen concesións. Súmase igualmente Gara Durán, artista multidisciplinar que destaca como cantante, compositora, produtora e pianista, e que achegará ao Osa do Mar unha proposta persoal e cargada de identidade, ampliando aínda máis a diversidade sonora desta edición de 2026.
Entre as novas confirmacións atópase Sobrezero, definidos pola organización como “unha das bandas revelación do 2026”, un proxecto que chega avalado polo seu crecemento nos últimos meses e pola súa capacidade para conectar co público en directo.
Tamén se suma Señora DJ, que será a encargada de pechar unha das noites do festival cun set pensado para manter o ambiente festivo ata o final, así como Rata, un dúo que promete converter a Praza do Concello nunha pista de baile co seu son directo e desenfadado.
Xunto aos primeiros anuncios musicais, Osa do Mar presentou tamén a nova ilustración e imaxe oficial do festival para 2026, que un ano máis leva a sinatura do artista Héctor Manasé. A súa creación volve converterse nun dos sinais de identidade do evento, reforzando a conexión entre música, arte e territorio que caracteriza ao festival burelés.
Desde a organización avanzan que este é só o comezo dun cartel que se irá completando nos próximos meses e que volverá situar a Burela como punto de referencia musical durante o inicio de setembro, cunha proposta pensada para gozar da música en directo nun ambiente próximo e singular.