Os veciños de Ourol esixen a cobertura inmediata da praza de médico do centro de saúde
A veciñanza de Ourol vén de trasladar publicamente o seu malestar pola situación que atravesa o centro de saúde do municipio, onde a praza de médico leva máis dun ano sen cubrir de maneira estable. Segundo explican, a atención depende de profesionais que se van relevando en días e horarios variables, o que, afirman, está xerando incerteza e incluso contradicións nos tratamentos.
Os usuarios sinalan que esta rotación provoca que en ocasións un facultativo recomende un diagnóstico ou un medicamento e, na seguinte consulta, outro profesional modifique a pauta ou desbote a valoración anterior. “Se tes un problema puntual aínda podes acudir, pero se rematas unha medicación e precisas continuidade, non sabes cando haberá médico. E coas baixas laborais sucede o mesmo: noutros centros non che poden facer o parte e aquí non hai información clara”, lamentan.
A situación complica especialmente o acceso para persoas maiores ou con dificultades de mobilidade, moitas das cales se ven obrigadas a pagar taxis para desprazarse. “Non custa o mesmo ir a Ourol que ter que ir a Muras”, lembran os veciños. Tamén denuncian que a saturación noutras áreas sanitarias, como Viveiro, Burela ou Lugo, fai inviable derivar pacientes sen incrementar aínda máis o colapso.
A cidadanía cuestiona o destino dos impostos destinados á sanidade e critica que a falta de planificación termine repercutindo na atención básica. Algúns veciños temen que a situación se prolongue ata que se acheguen novas citas electorais: “¿Estarán esperando a que haxa eleccións para anunciarnos a chegada dun médico e pedírannos o voto a cambio?”, expoñen.
Mentres tanto, demandan unha solución urxente que garanta un servizo médico estable, digno e acorde ás necesidades dun municipio que, din, non pode seguir sen atención sanitaria regular.