Os socialistas de Mondoñedo esixen solucións urxentes para a Ponte de Arco e outros problemas municipais
Os socialistas de Mondoñedo urxen ao goberno municipal do PP a actuar de inmediato para evitar o colapso da Ponte de Arco, en Masma, que leva en estado crítico preto de cinco anos. Na última sesión plenaria, celebrada tras catro meses sen convocatorias, o PSdeG presentou un rogo instando ao Concello a tomar medidas ou trasladar a cuestión ás administracións competentes. A deterioración da ponte impide a circulación de vehículos e está a causar numerosos prexuízos á veciñanza.
Na mesma sesión plenaria, os socialistas apoiaron unha Declaración Institucional que compromete ás distintas administracións a atopar unha solución urxente ás inundacións en Santa María Maior. Segundo denunciaron, varias vivendas están afectadas pola deficiente xestión das escorrentías, polo que consideran prioritario que todas as institucións traballen conxuntamente para resolver o problema.
O PSdeG tamén trasladou ao goberno local as queixas recibidas sobre o estado dos camiños municipais en Argomoso, especialmente no barrio de Sopena, onde o recente asfaltado foi deficiente, deixando a estrada nun estado similar ao anterior. Ademais, denunciaron que no barrio de Escourido o Concello non ten previsto mellorar os camiños, o que pon en risco a circulación dos veciños debido ao seu mal estado.
Outro dos rogos presentados foi a petición de limpeza en profundidade na Escola de Música Municipal, que levan tempo sen acondicionar. Tamén solicitaron a recolocación das pedras esparexidas arredor da igrexa de San Roque, que dan unha imaxe de abandono ao conxunto monumental.Os socialistas preguntaron pola situación actual do PEPRICH (Plan Especial de Protección e Reforma Interior do Casco Histórico), do que, segundo indicaron, existen informes desfavorables. Tamén reclamaron explicacións sobre o funcionamento da Biblioteca Municipal Peña Trapero, que forma parte da Rede de Bibliotecas Públicas de Galicia, pero actualmente non conta co equipamento necesario para que os usuarios accedan ás publicacións dispoñibles nesta plataforma.
Por último, o PSdeG preguntou polo recurso contencioso-administrativo dunha empresa de Lugo contra o Concello de Mondoñedo debido ao impago dunha factura de 1.023 euros correspondente á compra de bolsas de algodón en xuño de 2022. O alcalde, Manuel Otero, confirmou que o pago se realizou en decembro de 2024, argumentando que a demora se debeu a cuestións de contratación.