Os rexedores mariñaos tildan de “insultante” as palabras da responsable de Infraestruturas sobre a VAC
Os alcaldes socialistas da Mariña ven “insultante” as “mentiras” vertidas no Parlamento de Galicia pola Conselleira de Infraestruturas, Ethel Vázquez, sobre a Vía de Alta Capacidade Costa Norte. Os rexedores de Viveiro, Foz, Trabada, Lourenzá e Burela, que acompañaron á Deputada Patricia Otero para reclamarlle á Xunta prazos e orzamentos para esta infraestrutura estratéxica para a comarca tildan de “prepotente” a actitude da responsable de Infraestruturas durante a súa comparecencia, e acúsana de “botar balóns fóra”, escusándose nun discurso evasivo no que se limitou, “coma sempre”, a “culpar da súa incompetencia ao resto das administracións”, cando a execución desta obra é responsabilidade exclusiva da Xunta.
Séntense defraudados porque, en lugar de dar prazos e desbloquear os case 15 anos de paralización do PP, Ethel Vázquez confirmou que, “nin quere, nin ten intención ningunha” de facer realidade esta vía estratéxica para A Mariña, comprometida polo Partido Popular hai 22 anos.
“Unha vez máis, a Conselleira volveu a mentir en sede parlamentaria, o que me parece dunha enorme gravidade, porque é a Conselleira de todos os veciños e veciñas de Galicia, neste caso de Viveiro e da comarca da Mariña, e non do PP”, esgrimiu a Alcaldesa de Viveiro, María Loureiro. Lembrou que a realidade é que os mariñaos “levamos 14 anos esperando, e o Goberno do PP, primeiro con Feijoó e agora con Rueda, non fixo nin un só metro desta Vía de Alta Capacidade estratéxica para a comarca”, pois vertebra as costas das provincias de Lugo e A Coruña.
A Conselleira non contesta á solicitude de reunión de Viveiro
“Aquí en Viveiro había un trazado, aprobado e consensuado por todo os veciños e veciñas, e a Xunta impuxo outro sen ter en conta a ninguén. Agora entendemos que era porque non tiña intención de facelo”. Durante todos estes anos, incidiu Loureiro, “non só reclamos unha vía de Alta Capacidade para Viveiro, senón tamén sentarnos a falar coa Conselleira”. De feito, dixo, “no último Pleno fixemos unha proposta para modificar o PXOM e facilitar á Xunta que saque adiante a variante, solicitándolle unha reunión cos voceiros e voceiras da Corporación municipal. Pois ben, seguimos á espera”. Polo tanto, “que se deixe xa de poñer escusas, e de facer crer que por culpa da alcaldesa de Viveiro está bloqueada unha vía de Alta Capacidade territorial, e o que é máis vergonzoso, que teña a cara de dicilo sen tapuxos en sede parlamentaria e sen poñerse colorada”, subliñou María Loureiro.
“Queremos realidades, non só infografías”
Nesa mesma liña amosou a súa decepción o alcalde de Foz, Francisco Cajoto: ”O que queremos cando se lle pregunta a Conselleira, a titular que ten a responsabilidade e a que ten as competencias para construír a VAC, o que agardamos é que nos dea prazos e que nos detalle as actuacións que quedan pendentes, e non só con infografías como se fixo co viaduto sobre a ría de Viveiro, senón con realidades, con planos, con proxectos, con expropiacións, e con construcións”. Ademais, lembrou Cajoto Caserío que os Concellos de Burela e Foz teñen variantes desde hai moitos anos feitas polo Estado, e no caso de Viveiro con 15 mil habitantes e co servizo de Policía Nacional para toda a comarca, “segue sen variante coa cantidade de problemas e retencións de tráfico que se producen en épocas de verán”.
“Confirmado. Non é unha prioridade para a Xunta”
Así mesmo, criticou a falta de concreción de prazos a alcaldesa de Trababa, Mayra García Bermúdez, por parte da Xunta. “Dende logo queda constatado que esta obra da VAC non é unha prioridade para o Goberno galego, porque nin quere, nin ten intención de facer realidade esta vía”. “As obras que hai feitas da Costa Norte, os dous tramos executados, en Xove e Ortigueira, foron licitadas polos socialistas no Goberno de Touriño”, aseverou. De pouco serve, denunciou a rexedora, que “ano tras ano haxa partidas orzamentarias para esta obra, cando quedan en papel mollado”, porque, “os veciños e veciñas da Mariña seguimos sen ver un só metro máis desta Vía de Alta Capacidade”.
Coinciden os rexedores en que será de novo un Goberno socialista o que retome e execute esta infraestrutura, pois, tal e como xa anunciou o candidato do PSdeG á Xunta, José Ramón Gómez Besteiro, será a primeira obra que faga cando chegue ao Goberno galego.
Comparecencia con ton burlesco e ofensivo
Pola súa banda, a alcaldesa de Burela, Carmela López, recriminou á Conselleira a falta de humildade e o ton “burlesco” á hora de falar dunha vía tan importante para os mariñaos. “Non fomos ata a Cámara Galega para escoitar ataques ao Goberno Central, fomos para saber cando se vai a construír unha infraestrutura que é unha débeda con nós”. Do mesmo xeito, lamentou a Acaldesa de Lourenzá as palabras de Ethel Vázquez ao referirse á Mariña “como o pozo das fochancas”, e pola contra “non aportar nin unha soa previsión concreta, seguindo a castigar a toda unha comarca”.