Os populares de Foz denuncian a falta de limpeza no pobo
O Grupo Municipal do Partido Popular alerta da falta de limpeza no pobo, totalmente abandonado por parte do bipartito local, e que está a causar moi mala imaxe, aseguran. Denuncian sucidade nas rúas, praias e accesos sen limpar, aparcadoiros con escombros, fochancas sen reparar, tráfico caótico con cambios de sentido; así se posicionan nas redes veciños e turistas que lamentan o estado do pobo no inicio do verán.
“Desde o Partido Popular levamos meses advertindo desta situación, solicitando ao Goberno local de PSOE e BNG que adecente o pobo e o volvemos a trasladar novamente, a través dun rogo no último pleno, pero parece que o señor Cajoto vive na súa burbulla e non quere escoitar o que é evidente e ‘volveuno a coller o toro’, expón o voceiro do PP de Foz, Javier Castiñeira.
Os populares solicitan ao bipartito que, de maneira urxente, se poñan a traballar na limpeza do municipio e que subsanen, na medida do posible, a imaxe tan danada que está a quedar de Foz.