Os encontros NatureWatch desenvolveranse en Barreiros en marzo
Do 28 ao 30 de marzo vaise desenvolver en Barreiros o Encontro de Turismo e Observación da natureza NatureWatch A Mariña Lucense.
Os encontros NatureWatch son foros especializados de ecoturismo que se celebran en diferentes puntos de España, atendendo ás características singulares de cada lugar. Teñen como obxectivo contribuír ao impulso do turismo de observación da natureza e no caso da Mariña servirá para poñer en valor os recursos naturais locais e o potencial do territorio para desenvolver actividades relacionadas con esta modalidade turística, especialmente o seu patrimonio ornitolóxico, natural e xeolóxico.
NatureWatch está recoñecido pola Organización Mundial do Turismo como evento colaborador, que convoca a participantes nacionais e internacionais e congrega en cada edición a un gran número de persoas relacionadas coa práctica e divulgación do turismo sostible de natureza.
Actualmente, a Mancomunidade xunto a Daboecia Arte y Naturaleza, atópanse traballando na definición do programa do Encontro de cara á súa publicación e apertura de inscricións.