Organizan na Pontenova unha exposición con obxectos significativos das historias das familias
A Pontenova impulsa unha emotiva iniciativa baixo o título A historia nos recunchos dos armarios, un proxecto que busca recoller e poñer en valor as lembranzas das familias da parroquia. O obxectivo é encher o templo do Sagrado Corazón de recordos a través dunha exposición que recolla vestidos de vodas, bautizos e comuñóns, así como fotografías e obxectos relacionados con eses momentos especiais que marcaron a vida de moitas xeracións.
Desde a organización fan un chamamento á veciñanza para participar activamente nesta proposta, achegando as súas pezas e recordos entre os días 17 e 20 de novembro de 2025 na parroquia do Sagrado Corazón. As persoas interesadas poden contactar coa organización a través do teléfono 678 425 009 e preguntar por Rocío para concretar os detalles da súa colaboración.
Con esta exposición, A Pontenova quere render homenaxe á súa memoria colectiva e manter vivo o legado das familias que, a través dos anos, contribuíron a escribir a historia da comunidade.