Oito persoas feridas en Burela nun atropelo múltiple
Oito persoas resultaron feridas esta tarde durante as festas de Burela nun atropelo múltiple ocorrido sobre as 16.20 horas na explanada das festas.
O Centro Integrado de Atención ás Emerxencias (CIAE) recibiu entón un aviso de que un turismo levara por diante a varias persoas. As ambulancias e o helicóptero medicalizado do 061 desprazáronse ata lugar para atender aos feridos.
O causante sería un octoxenario que conducía un turismo e que, tras chocar cun obstáculo, desviouse da súa traxectoria, atropelando a oito persoas.
A policía local e a Garda Civil investigan agora o ocorrido. Os feridos foron trasladados ao Hospital da Mariña, un deles en estado crítico.
Carmela López, rexedora burelesa, comunicou que "ante a gravidade do sucedido, convoquei ao equipo de goberno, ao presidente da comisión de festas, ao xefe da Policía Local, ao capitán da Garda Civil e aos voceiros da oposición para compartir información, avaliar a situación e tomar as decisións que tocan con responsabilidade, serenidade e unidade".
"Estou en contacto directo coas familias, no lugar dos feitos e tamén no hospital, acompañando e ofrecendo todo o apoio que está nas nosas mans”, sinalou López.
“Como alcaldesa de Burela, quero trasladar en nome do Concello todo o apoio e forza ás persoas feridas no atropelo múltiple ocorrido esta tarde nas inmediacións do porto, en pleno desenvolvemento das nosas festas patronais, así como ás súas familias, que están a vivir momentos de enorme preocupación", engadiu.