O XIX Mercado de Primavera encherá O Valadouro de música, tradición e diversión familiar
O Valadouro prepárase para acoller o XIX Mercado de Primavera, unha xornada repleta de cultura, música e tradicións que terá lugar o sábado 22 de marzo de 2025. Desde as 10:00 da mañá ata as 19:00 da tarde, os postos do mercado encherán as rúas de artesanía, gastronomía e produtos locais.
A xornada estará animada por pasarrúas con agrupacións como Dambara, Amado Lar, Noroeste, Os Caliqueños, Los Támega e Festicultores Troupe. Ademais, na praza de Santa María, haberá concertos a cargo de Abóbriga (sesión vermú) e Nimbos (concerto de peche do mercado).
Para as familias, a programación inclúe espectáculos de títeres con Mircromina Teatro, maxia con David Méndez e teatro familiar con Inventi. Pola tarde, no aparcadoiro municipal, os máis pequenos poderán gozar de xogos tradicionais con Xotramu e paseos en poni.
O Mercado de Primavera tamén contará con actividades como a ruta de tapeo polos establecementos hostaleiros, demostracións de oficios tradicionais, un desfile de zocas e vestimenta, un concurso de carros decorados e moito máis.
O evento está organizado polo Concello do Valadouro e conta coa colaboración da Xunta de Galicia. Nos vindeiros días darase a coñecer o programa completo con horarios e localizacións detalladas.