O Vicedo reivindica a música tradicional co II Serán de Negradas
O Campo da Festa de Negradas converterase o vindeiro 21 de marzo nun punto de encontro para a música tradicional, a convivencia e o lecer coa celebración do II Serán, unha cita pensada para desfrutar en comunidade e poñer en valor a cultura popular galega.
A xornada contará cunha programación variada na que destaca o concerto do grupo Os Carecos, ademais da participación de distintos grupos que animarán a tarde e a noite cun ambiente festivo e participativo. A música e o baile tradicional serán os grandes protagonistas nun evento aberto a veciñanza e visitantes.
Entre as actividades previstas inclúese tamén un obradoiro de percusión impartido por Óscar Fojo, unha proposta formativa pensada para achegar os ritmos tradicionais a persoas de todas as idades, fomentando a aprendizaxe e a participación activa.
O Serán completarase cunha comida popular que incluirá callos, bebida e sobremesa, cun prezo de 20 euros, así como varios sorteos ao longo da xornada. A foliada será libre, convidando a todas as persoas asistentes a sumarse coa súa música, instrumentos e ganas de festa.
A iniciativa conta coa colaboración do Concello de O Vicedo, a Deputación de Lugo e a Asociación de Veciños San Miguel de Negradas, que apostan por este tipo de encontros como ferramenta para fortalecer a vida social, cultural e comunitaria da parroquia.