O Vicedo comprométese a mellorar o saneamento cando sexa viable economicamente
O Concello de O Vicedo amósase disposto a acometer obras de saneamento, pero sempre “a medida do posible e cando sexa economicamente viable”. Así o manifestou o alcalde, Jesús Novo, quen recoñeceu que existen núcleos de poboación que carecen deste servizo básico. Segundo explicou, será preciso elaborar un plan que determine tanto as necesidades reais como o custo que suporía a súa execución.
O rexedor subliñou que hai áreas con vivendas illadas ou mesmo deshabitadas onde “non compensa acometer unha instalación deste tipo”, polo que será necesario priorizar. “O importante é planificar ben, avaliar as posibilidades e actuar con responsabilidade para garantir a eficiencia do investimento”, engadiu.
En relación coa petición formulada polo BNG para poñer en marcha un plan de prevención de incendios, Novo lembrou que o Concello dispón xa dun documento aprobado no ano 2021 e subscrito coa Xunta de Galicia, que segue vixente.