O Vicedo afronta un novo pleno marcado polas acusacións de improvisación e bloqueo
O pleno ordinario celebrado o 26 de novembro no Vicedo deixou unha longa listaxe de rogos, peticións e advertencias por parte dos grupos da oposición, que coincidiron en sinalar diversas deficiencias en servizos municipais e unha falta de planificación que —aseguran— afecta directamente ao día a día da cidadanía.
O concelleiro e portavoz do BNG, Miguel Gómez Fraga, abriu a sesión expondo tres preocupacións principais: o funcionamento do servizo de recollida do lixo, as constantes incidencias no alumeado público e a ausencia de avances en medidas de apoio ao sector gandeiro nun contexto sanitario especialmente delicado.
No apartado dos residuos, o Bloque insistiu na “necesidade evidente” de reforzar o servizo municipal, que consideran insuficiente para garantir unha segregación axeitada. Sinalaron que en varias parroquias seguen faltando contedores de plástico e cartón, e que a falta de bases suxeitacontedores continúa xerando problemas de uso e mesmo de seguridade viaria. Ademais, lembraron que a creación dun punto limpo é unha demanda recorrente da veciñanza.
A situación do alumeado foi outro dos puntos destacados. Gómez Fraga advertiu do apagado recente no paseo de Moledos e na rúa Rosalía de Castro, dúas zonas moi transitadas e onde é habitual a presenza de xabaríns. A ausencia de iluminación, dixo, “incrementa a sensación de inseguridade”, polo que pediu aclarar a orixe das incidencias e restablecer o servizo con urxencia.
No eido gandeiro, o BNG puxo o foco na sucesión de enfermidades contaxiosas —lingua azul, enfermidade hemorráxica epizoótica e dermatose nodular contaxiosa— que están xerando malestar entre os produtores. O portavoz nacionalista reclamou acelerar a instalación dun punto de desinfección para o transporte de animais vivos, ao consideralo “fundamental para reforzar a bioseguridade”.
Durante o pleno tamén se informou da aprobación por unanimidade dunha moción sobre a mellora da recollida do lixo, enmendada polo PP. O goberno local explicou que continuará coa instalación das bases suxeitacontedores. En relación ao alumeado, detallouse que o apagado en Rosalía de Castro se debe a un cortocircuito aínda non localizado, mentres que en Moledos a autonomía das farolas solares non cobre todas as horas nocturnas.
O executivo municipal engadiu outros datos: a cobertura das prazas de médico dependerá da convocatoria da Xunta; o prego do Centro de Día está xa redactado e prevén publicalo en febreiro; e no Servizo de Axuda no Fogar agárdase unha pequena subida aínda sen confirmar. Tamén recoñeceron non saber cando se transferirán os fondos do canon de Sogama e explicaron que levan arredor de seis meses esperando o orzamento da empresa encargada da recollida de plásticos agrícolas.
O BNG tamén presentou unha moción para impulsar o “Plan Emprende Terras do Sor”, unha iniciativa que busca fomentar a creación de emprego mediante o apoio directo a novos proxectos empresariais nos concellos de Muras, Ourol e O Vicedo. A proposta pretende transformar o actual obradoiro de emprego Terras do Sor nun programa estable de emprendemento, no que os veciños dos tres municipios poidan presentar as súas ideas de negocio e optar a financiamento, baixadas de impostos, adquisición de material ou contratación de persoal. O Bloque defende que esta medida permitiría fixar poboación, ofrecer oportunidades á mocidade e fortalecer a colaboración histórica entre os tres concellos, promovendo un tecido económico máis dinámico e sostible na comarca.
Pola súa banda, o Grupo Municipal do PSdeG-PSOE destacou que a sesión volveu deixar en evidencia —segundo denunciaron— “a forma de gobernar do alcalde”: unha actitude autoritaria, nula planificación para o ano 2026 e unha “obsesión improdutiva coa Deputación de Lugo”, mesmo cando esta institución é, aseguran, a que máis investiu no municipio.
Os socialistas presentaron dúas mocións. A primeira, sobre Palestina, foi emendada de inmediato polo alcalde, algo que o grupo cualificou de “falta de vontade para un debate serio”. A segunda, centrada en instar á Xunta a atender as necesidades do Vicedo, foi parcialmente aceptada polo rexedor, pero —segundo o PSdeG— envolta de novas referencias á Deputación, desviando a atención das competencias autonómicas.
O grupo formulou tamén varios rogos: contar con información previa das actividades municipais, aumentar a frecuencia da recollida de enseres e publicar os bandos tamén na sede electrónica.
No capítulo de preguntas, os socialistas afirmaron que quedou patente a “falta absoluta de coordinación” do goberno local. Denuncian que o alcalde non detallou ningunha previsión para 2026, non explicou o prometido lavado de contedores nin os criterios para o anclaxe dos mesmos, evitou aclarar a regulación das Vivendas de Uso Turístico e mesmo non puido enumerar correctamente as parroquias do municipio.
Especial preocupación xerou a Modificación de Crédito por máis de 300.000 euros, financiada integramente con fondos propios. O PSdeG subliñou que o alcalde recoñeceu que non solicitou ningunha subvención para estas actuacións, agás a destinada á Escola do Vilar, despois de que a Xunta denegase a axuda.
Tanto BNG como PSOE coincidiron en reclamar maior planificación, transparencia e eficacia. “O Vicedo precisa un goberno que se centre no municipio, na súa xente e nas súas necesidades reais”, concluíu o PSdeG.