O Vicedo acolle a presentación do novo cómic de Cristian F. Caruncho
O Vicedo acollerá este xoves 11 de decembro a presentación dun novo cómic de Cristian F. Caruncho, artista ben coñecido pola súa implicación na creación dos carteis da Romaxe Viquinga nos últimos anos. A obra, titulada “O Día de S. Martiño”, ofrece un Western “rural” cargado de acción e humor, pensado para divertir a todas as idades.
A actividade terá lugar na Biblioteca da Casa da Cultura e dividirase en dúas sesións. A primeira, ás 17:30 horas, estará destinada ao público infantil, especialmente aos nenos e nenas de Primaria, que xa coñecen o traballo do autor e seguramente gozarán coa historia. A segunda sesión, ás 19:00 horas, será aberta a todo tipo de público e permitirá que maiores e pequenos poidan compartir a experiencia da presentación e coñecer os detalles da obra.
Con esta iniciativa, a Casa da Cultura continúa promovendo actividades culturais e literarias que achegan autores locais á veciñanza, fomentando a lectura, a creatividade e a participación comunitaria. O evento promete ser unha tarde entretida, na que a acción e o humor do cómic conquistarán tanto aos máis novos como aos adultos.
