O Valadouro incorpórase ao plan autonómico para impulsar nova vivenda protexida
O Valadouro xa forma parte do Programa de oferta de solo das entidades locais impulsado pola Xunta para facilitar a construción de vivenda protexida. A conselleira de Vivenda e Planificación de Infraestruturas, María M. Allegue, xunto co secretario xeral da Consellería, Yago Borrajo, asinou en San Caetano o convenio de colaboración co alcalde do municipio, José Manuel Lamela Piñeiro. Na sinatura tamén participou o director territorial da Consellería en Lugo, Marco Antonio Fernández Piñeiro.
A través deste acordo, a Xunta pon a disposición do Concello unha ferramenta que lle permitirá sacar a concurso público unha parcela de 2.010,88 metros cadrados, situada entre a rúa Rosalía de Castro e a avenida da Veiga, para a construción de cando menos 44 vivendas protexidas. O proceso realizarase en concorrencia libre e abrirase tanto a promotoras como a cooperativas, facilitando tamén a información á cidadanía sobre o solo dispoñible.
O Instituto Galego de Vivenda e Solo (IGVS) asumirá boa parte da tramitación técnica: a publicación do solo ofertado, a redacción dos pregos, os anuncios de licitación, a mesa de contratación e a valoración das propostas. Pola súa banda, o Concello só terá que facilitar os datos da parcela, participar na mesa e ditar a resolución final de adxudicación.
A conselleira Allegue destacou a relevancia desta colaboración e lembrou que O Valadouro é o quinto concello galego en adherirse ao programa, tras As Pontes de García Rodríguez, A Arnoia, Friol e Valdoviño. Segundo explicou, a iniciativa está a espertar o interese doutras administracións locais, e o prazo de adhesión permanecerá aberto sen límite temporal.