O Valadouro convoca o concurso-desfile de zocas e vestimenta tradicional do Mercado 2026
O Concello do Valadouro organiza unha nova edición do concurso-desfile de zocas e vestimenta tradicional, unha actividade que forma parte da programación do mercado tradicional do municipio e que pretende poñer en valor a cultura popular e os oficios vinculados á indumentaria galega.
O evento desenvolverase o sábado 28 de marzo de 2026 a partir das 13:00 horas no escenario instalado na praza de Santa María de Ferreira, onde as persoas participantes desfilarán mostrando as súas zocas e traxes tradicionais diante do público e do xurado encargado de valorar as propostas.
A iniciativa busca destacar tanto a recuperación da vestimenta tradicional como o uso das zocas, unha peza característica da cultura galega que durante décadas formou parte da vida cotiá no rural.
O certame contará con varias categorías para facilitar a participación de persoas de diferentes idades. Na modalidade infantil competirán, por unha banda, nenos e, por outra, nenas de ata 15 anos, sempre que teñan esa idade cumprida a 1 de xaneiro de 2026. Pola súa parte, a categoría adulta estará dividida en modalidade masculina e feminina, nas que poderán participar persoas maiores de 16 anos.
As persoas interesadas en participar poderán formalizar a súa inscrición desde a publicación das bases ata o venres 27 de marzo ás 14:00 horas. O trámite poderá realizarse presencialmente nas oficinas municipais ou na Casa da Cultura, así como a través da sede electrónica do Concello.
Dende o consistorio animan á veciñanza a sumarse a esta proposta que combina tradición, participación e dinamización cultural, convertendo o desfile nun dos momentos máis vistosos do mercado tradicional que cada ano se celebra en Ferreira.