O Valadouro aproba uns orzamentos de 3,17 millóns de euros
O Concello do Valadouro contará este ano cun orzamento de 3.178.000 euros, logo de que o pleno extraordinario do pasado 15 de abril dese luz verde ás contas propostas polo grupo de goberno. A aprobación foi posible grazas á concelleira de Udival, que apoiou co seu voto ao equipo do PP —formado por catro edís—, fronte á negativa do BNG e do PSOE, que sumaron catro votos en contra.
As cifras aprobadas delimitan como se repartirán os fondos públicos municipais ao longo deste exercicio. Case un millón de euros (994.132) reservarase para pagar ao persoal municipal, mentres que os gastos en bens e servizos correntes alcanzan os 1.471.160 euros, converténdose no capítulo máis voluminoso. As inversións reais, pola súa banda, contarán cunha dotación de 515.863 euros.
No tocante aos ingresos, o Concello estima recadar arredor de 700.000 euros mediante impostos directos, e unha cantidade moito menor a través de tributos indirectos. A isto engádense 474.552 euros procedentes de taxas municipais e outros ingresos, así como transferencias externas, que suporán preto de dous millóns (1,49 millóns en transferencias correntes e 499.206 en transferencias de capital).
O capítulo de investimentos inclúe actuacións repartidas polo termo municipal. Entre elas destacan a renovación do alumeado público no núcleo de Ferreira, cun custo previsto de 50.885 euros; o acondicionamento dos accesos ao barrio de Pardellas, que suporá un gasto de 84.344 euros; e a mellora dos camiños e accesos en Cabezán, cun investimento que supera os 130.000 euros.
Coa aprobación definitiva do orzamento, o executivo local poderá executar as actuacións previstas ao longo do ano, malia non contar co respaldo dos grupos da oposición, que manifestaron o seu desacordo co reparto das partidas e coa planificación global das contas.