O último sorteo da campaña da FCAM traerá a Burela a destacadas figuras da cultura galega
A Praza da Mariña de Burela converterase este sábado, 29 de novembro, no epicentro da quinta e última xornada da campaña De compras polo comercio da Mariña Lucense, organizada pola Federación de Comercio A Mariña (FCAM). En xogo estarán 500 euros en vales de compra, que se repartirán en tres premios de 250, 150 e 100 euros.
A presidenta da FCAM, Carmen Cruzado, explicou que todas as persoas que realicen compras entre o 24 e o 29 de novembro nos establecementos asociados a ACIA Burela poderán participar no sorteo. “Só teñen que achegarse entre as sete e as oito da tarde á Praza da Mariña para recoller as súas papeletas. Por cada tícket de compra entregaremos un boleto, e o sorteo celebrarase a partir das 20:00 horas”, detallou.
A campaña, que chega ao seu remate tras varias semanas de dinamización comercial, tivo como obxectivo “apostar polo pequeno comercio e atraer público á comarca”, sinalou Cruzado Iglesias. Para iso, a FCAM promoveu a chegada á Mariña de diferentes profesionais recoñecidos nos ámbitos do xornalismo, do deporte, do cine ou da literatura, converténdoos nun atractivo cultural e promocional para o comercio local.
Nesta última parada en Burela participarán catro convidados de referencia:
– Ángel de la Cruz, director, guionista e produtor de cine, recoñecido con tres premios Goya e tres Mestre Mateo.
– Estíbaliz Veiga, actriz, presentadora e guionista, ademais de pedagoga teatral e coach.
– María Solar, escritora, xornalista e presentadora da TVG e da Radio Galega, Premio Xerais de Novela 2022.
– Guido Guía, guía oficial de turismo de Galicia, turismólogo e profesor-titor do Grao de Turismo da UNED de Lugo.
Segundo avanzou a presidenta da federación, a xornada incluirá unha visita con estes convidados aos comercios locais de Burela e a distintos enclaves turísticos do municipio. “Pola noite celebraremos o sorteo e, como en cada edición, tamén aproveitarán para degustar a excelente gastronomía da nosa terra”, engadiu.
Desde a FCAM animan á veciñanza e á clientela dos comercios burelenses a participar neste último sorteo da campaña De compras polo comercio da Mariña Lucense, que conta co apoio da Dirección Xeral de Comercio da Xunta de Galicia.