O Seminario de Estudos Terra de Viveiro celebrará o Día das Tortillas
O Seminario de Estudos Terra de Viveiro celebrará o vindeiro domingo 26 de marzo a tradición local do Día das Tortillas, previa á Semana de Paixón, e que tanto arraigo mantén na nosa cidade. Durante a xornada na cima do monte San Roque poderemos gozar das fermosas paisaxes do val e da ría de Viveiro, así como das explicacións do Cronista Oficial da cidade, Carlos Nuevo Cal, quen falará sobre as orixes da advocación ao santo de Montpellier e da súa relación coa peste e con outras pandemias. Igualmente, explicaranse distintas lendas e historias relacionadas co mar de Viveiro, fonte inesgotable de tradicións e cultura.
Deseguido, xantarán na Parrillada Mirador San Roque para degustar as típicas tortillas, un variado churrasco e sobremesa, no ambiente de confraternidade que nos caracteriza.
A saída será ás 13.00 horas da Estación de Autobuses de Viveiro. O prezo será de 20 euros para socios, e 23 non socios. E o número de prazas está limitado a 50 persoas por mor de espazo no restaurador. A retirada de tickets farase en Seguros Mapfre Akilino.
