O sector hostaleiro de Burela xa pode solicitar as axudas para paliar os efectos da pandemia
![Casa_concello_Burela](https://amarinaxa.com/wp-content/uploads/2021/01/Casa_concello_Burela.jpg)
No Boletín Oficial da Provincia foron publicadas as bases reguladoras das axudas ao sector hostaleiro do Concello de Burela, que están destinadas a paliar os efectos da pandemia do covid19. Os hostaleiros dispoñen dun mes para presentar a documentación e os xustificantes de pago das taxas de lixo e de auga correspondentes a novembro e decembro de 2020 e xaneiro e febreiro de 2021. O concelleiro de Turismo e Comercio, Ramiro Fernández, destacou que o equipo de goberno está a cumprir co acordado no seu día co sector hostaleiro. A contía destinada a estas axudas é de 30.000 euros.
Fernández Rey contou que “saen publicadas no Boletín Oficial da Provincia as bases reguladoras das axudas para o sector da hostalería no termo municipal de Burela, para paliar os efectos da pandemia. Son unhas bases que tíñamos comprometidas xa hai tempo co sector, despois de falar con eles, e constan basicamente de eliminarlles o pago da taxa de lixo e de auga durante 4 meses”.
O concelleiro de Turismo e Comercio explicou que “están a disposición dos interesados na sede electrónica de Burela, onde poden baixar os impresos que hai que cubrir. O importe total das axudas vai ascender a 30.000 euros e para ser beneficiario da axuda evidentemente hai que cumprir coa lei estatal de subvencións públicas”.
O edil burelés subliñou que “o que se vai subvencionar neste caso é o último bimestre do ano 2020, novembro e decembro, e o primeiro do 2021, é dicir xaneiro e febreiro. O único que hai que facer é presentar o xustificante de pago desas facturas de auga e de lixo e automaticamente xa, en canto poidamos, resolveremos e devolveremos eses cartos que se gastaron en auga e lixo para todo o sector hostaleiro e de ocio nocturno de Burela”.
Ramiro Fernández insistiu en que “isto era un compromiso do equipo de goberno cos hostaleiros. En varias reunións que mantivemos con eles foi o que acordamos”. O edil burelés aludiu tamén á exención das taxas das terrazas e ás axudas ao comercio.
E lembrou: “temos que recordar que sacamos unhas axudas para o comercio no seu día. Isto é froito do diálogo e da negociación con este colectivo e esperamos que estas axudas sirvan para paliar os efectos desta tremenda pandemia que vimos de pasar. Os trámites administrativos retrasaron a súa publicación, pero xa poden solicitalas e teñen un mes para facelo a partir de hoxe”.