O PSOE reivindica o seu traballo na consolidación de Viveiro como destino turístico
Viveiro viviu este verán unha das mellores tempadas turísticas da súa historia, con milleiros de persoas que ateigaron rúas, establecementos hostaleiros, comercios, praias e espazos verdes. O PSOE local subliña que este éxito non é casual, senón froito da planificación dos gobernos socialistas ao fronte do Concello nos últimos anos.
A exconcelleira de Turismo, Marisol Rey, deseñou unha estratexia sólida e ambiciosa, baseada na promoción da vila en feiras nacionais e internacionais. Non se limitou a Fitur, senón que levou o nome de Viveiro a outros foros de gran relevancia. “Viveiro foi pioneiro na participación en feiras turísticas cando outros concellos da Mariña e mesmo da provincia de Lugo non acudían. Grazas a esa aposta abrimos camiño, e despois seguiron máis concellos, o que tamén é positivo para dar a coñecer a comarca no seu conxunto”, explicou a voceira socialista María Loureiro.
Esta aposta permitiu situar Viveiro no mapa turístico todo o ano, logrando desestacionalizar a oferta, diversificar os atractivos e garantir un fluxo constante de visitantes. O obxectivo, sinalan, é “evitar que o turismo se concentre só en curtos períodos de tempo” e favorecer así a hostalaría e o comercio local cun impacto sostido.
O verán deixou tamén un balance moi positivo no ámbito cultural e festivo. O PSdeG-PSOE quixo agradecer o labor das comisións de festas parroquiais e destacou especialmente o esforzo da mocidade que este ano asumiu a organización das Festas Patronais. “O seu traballo durante todo un ano fixo posible uns festexos con identidade propia que deixaron moi satisfeita á veciñanza”, recoñeceron.
Dende o partido lembran que os distintos gobernos socialistas sempre apoiaron as festas patronais e parroquiais, salvo no 2024, cando a situación económica non o permitiu. En conxunto, defenden que Viveiro se reafirma como destino turístico e cultural de referencia grazas á planificación e ao compromiso mantido nos últimos anos.