O PSOE de Mondoñedo esixe á Xunta unha nova parada de autobús para os escolares
Os Socialistas de Mondoñedo demandan ao Goberno do Partido Popular na Xunta de Galicia a creación dunha nova parada de autobús regular no municipio, coa finalidade de facilitar o acceso do alumnado mindoniense aos centros educativos da Mariña. Esta reclamación vén motivada pola actual situación, onde a liña regular de autobuses realiza a súa primeira parada en Alfoz, deixando a Mondoñedo sen servizo directo.
“O PSdeG insta ao Goberno do PP de Mondoñedo a buscar unha solución con tódolos axentes implicados, ante a inexistencia de transporte público gratuíto aos centros educativos da Mariña”, afirmaron os socialistas. Aseguran que esta situación preocupa de maneira especial ás familias afectadas, que, a poucos días do inicio do curso escolar, aínda non saben se os seus fillos contarán con transporte para asistir ás aulas.
Dende o PSdeG subliñan que é crucial que o Goberno Municipal se involucre activamente na busca dunha solución. “Entre todos temos que atopar unha saída a esta problemática, que non só preocupa ás familias, senón que tamén pode comprometer a educación dos mozos e mozas de Mondoñedo”, concluíron.
O curso escolar está a piques de comezar e a incerteza sobre a dispoñibilidade do transporte público está a causar inquietude entre a comunidade educativa da zona.