O PSOE acusa ao PP de impedir a restauración conxunta do Mosteiro de Lourenzá
O senador socialista César Mogo denunciou hoxe que o Partido Popular rexeitou na Comisión de Cultura do Senado unha proposta do PSOE para que a Xunta de Galicia e o Goberno central sumen esforzos e recursos na restauración integral do Mosteiro de Lourenzá. “A única opción para afrontar unha rehabilitación de envergadura como a que require o Mosteiro é que ambas administracións acheguen financiamento conxunto, pero o PP negouse a esta proposta e presentou un texto propio que rexeita compartir a restauración”, afirmou.
Mogo acusou aos populares de Lugo de confirmar, con este voto en contra, que a Xunta se desentende do futuro do monumento. Ademais, criticou que a moción presentada polo PP ignora os principios establecidos en materia de patrimonio na Constitución, no Estatuto de Autonomía de Galicia, na Lei de Patrimonio de Galicia e mesmo na Lei de Camiños de Santiago. “O senador Balseiro reparte responsabilidades de forma caprichosa e sen rigor, coma se a Autonomía de Galicia non existise”, subliñou.
O senador socialista denunciou que “o único que lles importa aos senadores do PP pola nosa provincia é eximir á Xunta de calquera responsabilidade, neste caso con Lourenzá”. Insistiu en que a proposta socialista non é outra que lograr que as dúas administracións se coordinen para financiar e executar unha intervención imprescindible, “pero o PP dixo que non”.
Mogo tamén quixo poñer en valor a xestión da alcaldesa de Lourenzá, asegurando que “se deixa a pel polo seu Concello e traballa incansablemente pola restauración do Mosteiro”. Por iso, defendeu que a rehabilitación debería acordarse conxuntamente.
Por último, recalcou que, “a pesar da confusión que queren provocar, o PSOE ten un interese real na recuperación do Mosteiro e por iso ofreceu á Xunta financiar entre todos un traballo cuxo custo é elevado”. Subliñou que a colaboración entre administracións “é de sentido común e seguro que así o valoran os cidadáns”. Segundo Mogo, a resposta do PP foi rexeitar a proposta e insistir en que a Xunta só colaborará coa xa coñecida fórmula de “invito eu, pero pagan os demais”.