O PSdeG denuncia que Xove queda “de novo á marxe” nos Orzamentos da Xunta para 2026
O PSdeG-PSOE de Xove acusa á Xunta de volver deixar o municipio “completamente abandonado” nos Orzamentos de 2026, malia as reiteradas promesas do alcalde, Demetrio Salgueiro, que —segundo lembran— leva dezaoito anos anunciando actuacións que non se materializan. Para corrixir este “abandono estrutural”, o Grupo Municipal impulsou, a través do Grupo Parlamentario Socialista, un conxunto de emendas que buscan incrementar o investimento autonómico nun concello que consideran “sistematicamente esquecido”.
A formación critica que o proxecto orzamentario do Goberno galego recolle partidas “testemuñais” e claramente insuficientes para tres actuacións que consideran estratéxicas: a ampliación do Polígono Industrial, o acondicionamento do Portiño de Morás e a modernización da rede de abastecemento de auga potable. “En dezaoito anos de anuncios, nin unha soa das grandes promesas do alcalde aparece cun investimento serio e real”, afirman.
No ámbito industrial, o PSdeG lembra que a ampliación do Polígono de Xove se anuncia desde hai anos e require un investimento superior aos 4 millóns de euros. Con todo, a Xunta só reserva 80.000 euros para 2026, unha cifra que cualifican de “irrisoria”. Por iso, propoñen destinar no próximo exercicio polo menos un terzo do custo total “se realmente existe vontade política de impulsar o emprego e a actividade económica”.
A situación no Portiño de Morás é, segundo denuncian, similar. O PSdeG asegura que se trata dunha “promesa infinita” que o alcalde repite desde o seu primeiro mandato e que nunca se materializa, malia os anuncios de obras “inminentes”. A partida incluída para 2026, de 87.000 euros, queda moi lonxe dos 7,5 millóns estimados polos estudos actuais. Reclaman que a Xunta comprometa polo menos un cuarto deste importe no vindeiro ano e garanta “un investimento real e non só titulares”.
A terceira emenda céntrase na rede de abastecemento de auga potable, que os socialistas cualifican de “terceiro mundista”, con restricións nos meses de verán e incidencias frecuentes de turbidez no inverno. Un estudo técnico cifra en 1,5 millóns de euros a modernización completa da rede, pero a Xunta non reserva “nin un só euro” e o goberno local —aseguran— tampouco promove xestións para acelerar o proxecto. “Falamos dun servizo esencial, impropio dun municipio do século XXI, que afecta ao benestar e á saúde da veciñanza”, advirten.
O PSdeG insiste en que esta falta de investimento non é nova e lembra que a Xunta leva case dúas décadas sen executar obras de relevancia en Xove, malia que o PP mantén a maioría absoluta no municipio desde hai 45 anos. Sinalan que “as únicas actuacións importantes” da administración autonómica en Xove corresponden a gobernos socialistas: a traída de augas do Cruceiro, con Fernando González Laxe, e a depuradora de Rego-Sanguento, baixo o mandato de Emilio Pérez Touriño.
Por todo isto, piden ao presidente Alfonso Rueda que remate con esta “marxinación constante” e que atenda as emendas presentadas “con criterios de equidade territorial”. “Xove non pode seguir quedando atrás ano tras ano. Agardamos unha rectificación que, dunha vez por todas, poña fin a que o noso concello siga sendo o gran ignorado no mapa orzamentario galego”, conclúen.