O PSdeG de O Vicedo reclamará no pleno un plan urxente de saneamento para todo o municipio
O Grupo Municipal Socialista de O Vicedo presentará no pleno do vindeiro mércores 30 de xullo unha moción na que insta ao goberno local a poñer en marcha un plan integral para mellorar o saneamento das augas no conxunto do termo municipal.
A iniciativa responde á realidade de que moitas parroquias e núcleos poboacionais carecen totalmente de rede de saneamento ou dispoñen de infraestruturas insuficientes e obsoletas. Segundo os socialistas, esta carencia representa un grave perigo para a saúde pública, a protección do medio natural e a calidade de vida da veciñanza, especialmente nas zonas rurais.
A moción reclama a realización dun estudo técnico detallado e urxente que permita identificar os puntos máis vulnerables e as áreas sen ningún tipo de servizo de saneamento. A partir dese diagnóstico, o PSdeG propón elaborar un Plan Municipal de Saneamento que estableza as prioridades de intervención, os prazos de execución e unha planificación orzamentaria acorde ás necesidades detectadas.
A formación socialista tamén suxire acudir a fontes de financiamento externas como a Deputación de Lugo, a Xunta de Galicia e o Goberno central, co obxectivo de garantir os recursos necesarios para executar as obras.
Entre as medidas concretas, inclúese a creación dun calendario de actuacións co compromiso de comezar as intervencións nas zonas máis afectadas, así como establecer mecanismos para que a cidadanía reciba información clara e detallada sobre os pasos que se vaian dar e os prazos previstos.
“Non estamos a falar dun luxo, senón dun dereito fundamental”, sinalan desde o grupo socialista, que advirten de que a situación actual “pon en risco a salubridade das vivendas, a protección ambiental e o desenvolvemento sostible do noso territorio”.
O PSdeG espera contar co apoio dos demais grupos municipais. “O acceso a un sistema de saneamento adecuado é unha responsabilidade das administracións públicas. Non podemos permitir que hoxe en día, en pleno século XXI, moitas parroquias do Vicedo continúen sen rede de sumidoiros ou con instalacións deterioradas”, conclúen.