O PSdeG de O Vicedo aplaude a reparación dun parque infantil tras máis dun ano de advertencias sen resposta
O grupo municipal do PSdeG en O Vicedo celebrou esta semana o comezo das obras de reparación do parque infantil que presentaba graves deficiencias estruturais por mor de filtracións de auga. A formación socialista lembra, porén, que a intervención chega logo dun ano de demora e advertencias reiteradas sen resposta por parte do executivo municipal.
Segundo explican desde o PSdeG, xa no pleno de maio de 2024 puxeron sobre a mesa a existencia de filtracións que comprometían a seguridade da infraestrutura e, por tanto, das crianzas usuarias do espazo. A alcaldía, sinalan, respondeu entón que “non tiña noticias” do problema, tal como recolle a acta oficial daquela sesión.
Lonxe de resolverse, a situación mantívose sen cambios durante meses. No pleno de marzo deste ano, os socialistas volveron esixir a reparación inmediata do parque e advertiron dos riscos que supuña manter aberto un espazo nesas condicións, pero, novamente, non obtiveron resposta do goberno local.
Agora, e tras un longo período de silencio institucional, o parque foi finalmente pechado e deron comezo os traballos de reparación. Desde o PSdeG valoran positivamente esta actuación, pero remarcan que chega “tarde e mal”, e lembran que a presión veciñal e política foi clave para forzar a intervención.
“A seguridade das crianzas non pode depender do calendario político”, sinalan desde o grupo socialista. “A veciñanza merece ser escoitada, e os problemas graves deben abordarse con responsabilidade e dilixencia”, engaden. A formación insiste en que non deixará de denunciar o abandono ao que, din, está sometido O Vicedo por parte do actual goberno.