O PSdeG de Mondoñedo reclama que o Concello asuma unha factura derivada das inundacións nunha vivenda de Santa María Maior
O grupo municipal socialista de Mondoñedo instou ao Goberno local do Partido Popular a facerse cargo do pagamento dunha factura de 361 euros correspondente a unha intervención de emerxencia nunha vivenda do barrio de Santa María Maior, afectada por inundacións recorrentes cada vez que chove. O asunto foi tratado no pleno celebrado no mes de maio, onde o PSdeG presentou un rogo para que a contía sexa asumida con fondos municipais.
Os socialistas consideran que o veciño afectado, de nome José, non debería soportar este tipo de gastos, dado que “non é responsable da situación e, polo tanto, non lle corresponde asumir este custo”. Ademais, lembran que se trata dunha familia en situación vulnerable, cuxos membros son pensionistas. Por iso, solicitaron tamén que o Goberno local abra unha vía de diálogo co Consorcio Provincial de Bombeiros co obxectivo de evitar sancións similares no futuro, mentres non se adopten solucións definitivas ao problema das inundacións.
Na mesma sesión plenaria, o equipo de Goberno recoñeceu que o Concello tivo que facer fronte ao pagamento dunha reclamación administrativa presentada pola empresa Estrives Ventures S.L. por un importe de 9.559 euros. Esta cantidade corresponde aos traballos de redacción, xestión e tramitación do Plan de Sostibilidade Turística de Destino, unha iniciativa pola que o Concello non logrou ningunha subvención. Dende o PSdeG cuestionan esta inversión e sinalan que “sería moito máis eficaz manter aberta a Oficina de Turismo durante todo o ano para atender os visitantes, que gastar fondos en proxectos sen planificación nin sentido práctico”.
Outra das cuestións abordadas polos socialistas foi o atraso na concesión dunha licenza urbanística para unha obra de rehabilitación nun inmoble da Praza da Catedral, malia contar xa cos informes favorables do servizo de Patrimonio.
No apartado de melloras urbanas, o PSdeG reclamou a plantación de árbores na zona de Viñas da Veiga, concretamente na entrada inferior do Campo de Fútbol, ao carón do cuartel da Garda Civil. Argumentan que “antes existía arborado nesta zona, que agora se atopa nun estado de abandono evidente”. Nese sentido, tamén demandan a limpeza das beirarrúas da contorna e o desbroce da maleza. Por último, piden que se acometa a poda ou, de ser o caso, a corta das árbores situadas na estrada de entrada a Mondoñedo, entre a Volta Grande e a zona dos Remedios.