O premio vivarirense de novela Vilar Ponte entregarase en decembro
A alcaldesa de Viveiro, María Loureiro, informou sobre que a gala de entrega do II Premio de Novela Vilar Ponte terá lugar o 5 de decembro de 2019, ás 20.30 horas, no Teatro Pastor Díaz. No transcurso da mesma entregaranse o 1º e 2º premio deste certame que naceu co dobre obxectivo de render homenaxe aos irmáns Antón e Ramón Vilar Ponte e recoñecer o seu labor, ao tempo que se pretende apoiar e difundir a literatura en lingua galega.
O Concello agarda que esta segunda edición sexa un novo éxito e sirva para consolidar este premio literario dentro do marco cultural galego. Considera Loureiro que é unha boa oportunidade para todos aqueles escritores e escritoras que queiran dar a coñecer as súas obras e a dotación económica do premio é importante, 4.000 euros para o 1º premiado e 1.000 euros para o segundo, ademais da placa e do diploma, que serán entregados no acto referido.
Finalmente, Loureiro aproveitou a ocasión para lembrar que o prazo para a presentación das obras, de extensión e temáticas libres, remata o 31 de outubro de 2019.