O PP ribadense pide ao Goberno local un plan de seguridade para o colexio Sagrado Corazón
A vicevoceira do Grupo Municipal do Partido Popular de Ribadeo, Elena Sierra, esixe ao Goberno local “un plan de seguridade para o colexio Sagrado Corazón igual que o que está en marcha para o colexio público Gregorio Sanz”.
A popular constatou que “existe un problema de seguridade á hora da saída do colexio dos nenos e nenas que asisten ao colexio Sagrado Corazón” despois de escoitar as queixas de varias familias con alumnos neste centro.
A popular sinala que “o noso grupo sempre apostou por apoiar aos dous centros aos que asisten nenos e nenas de Ribadeo, é dicir, a tódalas familias ribadenses”. Nese sentido, defende que “non se pode nin se debe abandonar aos nenos e familias que levan aos seus fillos a este colexio que non conta con ningún tipo de seguridade á hora da saída dos nenos”.
É por iso polo que “pedimos un plan de seguridade para ambos centros sen diferencias e, polo tanto, que se incorporen axentes da Policía Local para velar pola seguridade dos nenos e nenas que saen de estudar no colexio Sagrado Corazón”. É dicir, os populares consideran que “dende o goberno local se debe apostar e respaldar aos dous colexios por igual”.