O PP reivindica que a Mariña recibirá máis de 4,6 millóns da Xunta en 2026
Os concellos da Mariña lucense contarán en 2026 cun impulso económico adicional da Xunta de Galicia a través do Fondo de Cooperación Local, que ascenderá a máis de 4,6 millóns de euros. Así o anunciaron este martes os deputados do Grupo Popular Cristina Sanz e José Manuel Mato, quen mantiveron unha reunión institucional coa alcaldesa de Viveiro, Mariña Gueimunde.
Os parlamentarios subliñaron que a partida destinada ao fondo experimentará un incremento do 12% respecto ao exercicio anterior. En total, os municipios mariñaos recibirán 4.226.181 euros do fondo base correspondente a 2026, aos que se engadirán 416.340 euros procedentes do fondo adicional de 2024.
O reparto, determinado polo número de habitantes de cada municipio, sitúa a Viveiro como o concello que máis achega percibirá, con 556.976 euros. Séguenlle Ribadeo (516.398 euros) e Foz (506.310 euros). Pola contra, Riotorto (171.347 euros), Trabada (183.026 euros) e Lourenzá (183.272 euros) serán os que reciban menor dotación.
Cristina Sanz enfatizou que Galicia “foi pioneira na posta en marcha, no ano 2011, dun sistema estable de financiamento municipal regulado anualmente a través das leis de orzamentos”. A deputada reclamou tamén que o Goberno central avance no deseño dun novo modelo estatal de financiamento local “que teña en conta a realidade galega, marcada pola dispersión poboacional e o envellecemento”.
Pola súa banda, José Manuel Mato lembrou que a achega do fondo non é a única vía de apoio autonómico á Mariña. O deputado destacou que a Xunta prevé investir máis de 25 millóns de euros na comarca ao longo de 2026, cunha ducia de actuacións consideradas prioritarias. Entre elas citou a mellora do sistema de saneamento e a nova depuradora de Burela; a continuación das obras da EDAR de Foz; a ampliación do porto de Morás, en Xove; a reparación das redes de abastecemento de Ribadeo e Trabada; a remodelación da dársena de Foz; o acondicionamento do porto de Celeiro-Viveiro e o avance nas fases do plan director do Hospital da Mariña.
Segundo explicaron, o conxunto destes investimentos permitirá reforzar servizos básicos, modernizar infraestruturas e garantir un desenvolvemento equilibrado nos concellos mariñaos.