O PP reclama un cambio na Deputación "para limpala de condutas reprobables"
Os deputados do Grupo Provincial Popular ofreceron esta mañá unha rolda de prensa na que valoraron os 15.892.432,45€ repartidos a dedo por PSOE e BNG en 94 convenios dos que só 40.000€ (nun único convenio) foron para un concello gobernado polo PP (para cumprir coa tradición de instalar un Belén por parte dunha asociación); na que tamén apelaron a que “dende este mércores haxa un novo tempo na Deputación de Lugo, que deixe fóra condutas reprobables e se comece a tratar de forma igualitaria a todos os lucenses”.
O voceiro provincial popular, Antonio Ameijide, lamentou que “o sectarismo” segue a ser a folla de ruta que rexe a Deputación de Lugo, cun PSOE e un BNG “unicamente preocupados por alimentar aos seus, dando as costas a máis da metade dos concellos da provincia”.
Neste senso, Antonio Ameijide afirmou que “senón hai un novo tempo desde este mércores, cun cambio real no goberno da Deputación; a alternativa será o pacto da vergoña xa que na sombra seguirá mandando o acusado, a persoa que seguirá dirixindo a Deputación na sombra, pasando as decisións de tomarse no despacho de presidencia, a tomarse nas mesas das cafeterías, o lugar no que supostamente se ofrecían postos de traballo en administracións públicas a cambio de outro tipo de favores para o presidente”.
O voceiro popular insistiu na necesidade de aire fresco e dun cambio no goberno da Deputación de Lugo porque “todo apunta a que o mércores pretenden reeditar un novo pacto PSOE-BNG, que será o pacto da vergoña, do machismo, dos presuntos acosos sexuais, da incoherencia, da falta de ética, da renuncia aos principios e que deixa manchados e inhabilitados aos 13 deputados que o sosteñan, e será o fin de Ana Pontón”.
Antonio Ameijide explicou que os 15,8 millóns de euros destinados a convenios por PSOE e BNG demostran que “os bipartitos nos saen moi caros a todos os lucenses”, poñendo sobre a mesa que “estes pactos de perdedores”, tanto na Deputación como en varios concellos da provincia “o único que propician é o fomento das rivalidades internas que pagamos todos os lucenses, así como unha gran discriminación que sofren máis da metade dos concellos da provincia que non teñen acceso aos fondos provinciais vía convenio”.
O voceiro popular puxo como exemplo desta afirmación os concellos de Lugo, Taboada e Barreiros, todos eles dirixidos por bigobernos de PSOE e BNG, que son os tres concellos que máis fondos recibiron da Deputación a través de convenios.
Concello de Lugo: 2.136.118,59€
Concello de Barreiros: 1.609.823,45€
Concello de Taboada: 1.117.127,96€
Uns datos sobre os que Ameijide realizou dúas reflexións: “En primeiro lugar, paréceme chamativo que o Concello de Lugo, cun orzamento moi semellante á Deputación de Lugo, teña esa dependencia total do ente provincial, o que deixa en moi mal lugar a xestión de PSOE e BNG no concello tras 26 anos; e, en segundo lugar, a incoherencia de que concellos cun número de habitantes superior a Barreiros ou Taboada, como Ribadeo, Chantada, Outeiro de Rei, Castro de Rei, Cospeito ou Friol non reciban nin un só euro vía convenio, o que evidencia o sectarismo de PSOE e BNG á fronte do goberno provincial”.
“PSOE e BNG, dende o goberno da Deputación non miran nin as necesidades reais, nin a poboación; o único criterio que lles preocupa é a afinidade política e persoal de quen goberne”,criticou.
O voceiro popular afirmou que “o uso e abuso da chequeira provincial para intereses internos e persoais dos cargos de PSOE e BNG é para tentar manter as súas alcaldías a golpe de chequeira, pero a realidade é que todos eses fondos destinados aos bipartitos non redundan en beneficios para os veciños, senón que se empregan nunha loita de egos entre os aspirantes ás alcaldías, deixando á marxe os intereses da provincia e dos veciños”.
Ameijide incidiu en que “o que necesitan a provincia e a Deputación é aire fresco. Se o PP chega á presidencia da Deputación estas desigualdades non se darían, co PP todos os alcaldes da provincia sempre terían as portas da Deputación abertas, do mesmo xeito que os fondos provinciais repartiríanse de forma igualitaria”.
BALANCE DA ÚLTIMA XUNTA DE GOBERNO
Antonio Ameijide tamén quixo valorar a última xunta de goberno da Deputación do ano 2025, celebrada o martes 30 de decembro, unha hora antes do pleno extraordinario no que se fixo efectiva a dimisión de José Tomé.
Unha xunta de goberno na que o goberno de PSOE e BNG aprobou máis de 1,6M€ (1.668.336,38€) a Concellos onde o BNG ten responsabilidade de goberno ou a proposta de áreas que son competencia do BNG no goberno provincial. “Unha proba máis de que o BNG fai o paripé de non acudir ás xuntas de goberno, pero negocia millóns de euros a porta pechada”, sinalou.
Antonio Ameijide afirmou que “mentres José Tomé fixo todo o posible para pasear en coche oficial ata o último minuto, Efrén Castro facía o paripé ante os medios de comunicación mentres pechaba os últimos acordos millonarios nos despachos”.
Durante o 2025, PSOE e BNG repartiron a porta pechada cada venres en xunta de goberno 15.892.432,45€, repartidos en 94 convenios:
12.079.020,31€ en 64 convenios con concellos gobernados polo PSOE
2.608.144,99€ en 19 convenios con concellos gobernados polo BNG
1.165.267,15€ en 10 convenios con concellos gobernados por independentes
40.000€ nun único convenio cun concello gobernado polo PP