O PP de Trabada denuncia unha nova suba nas taxas da auga e do lixo
O Partido Popular de Trabada amosou o seu rexeitamento ás novas cotas previstas para o servizo de subministración de auga e recollida de lixo, que suporán, segundo sinalan, un novo esforzo económico para as familias e os negocios do municipio.
No caso do consumo doméstico de auga, a tarifa fixa será de 10 euros por bimestre ata 30 metros cúbicos, incrementándose con 0,45 euros por cada metro cúbico adicional a partir dese límite. Para usos industriais, establécese unha cota de 20 euros bimestrais ata 50 metros cúbicos, aplicándose tamén 0,45 euros por metro cúbico cando se supere esa cantidade. Ademais, os dereitos de enganche fíxanse en 90 euros para vivendas e 100 euros para actividades industriais.
En canto á taxa do lixo, as vivendas no núcleo urbano pasarán a aboar 27 euros por bimestre, mentres que no resto do municipio a cota será de 24 euros. Os establecementos hostaleiros, supermercados, restaurantes, cafeterías e outros locais comerciais afrontarán importes que oscilan entre os 40 e os 60 euros bimestrais, dependendo da súa actividade e localización.
Desde o PP consideran que esta revisión das ordenanzas fiscais chega nun momento no que a cidadanía aínda está asumindo a suba do IBI nun 50%. “É unha nova carga para os veciños de Trabada”, sinalan, ao tempo que sosteñen que o Concello podería facer fronte a estes custos sen trasladalos á poboación, tendo en conta o incremento de ingresos rexistrado nos últimos exercicios.
Os populares critican tamén a xestión do executivo municipal, ao que acusan de non escoitar as demandas da veciñanza nin de rectificar as súas decisións. Ao seu xuízo, o municipio precisa “máis humildade, máis diálogo e unha administración máis eficaz” para evitar que o peso das contas públicas recaia, unha vez máis, sobre os contribuíntes.