Actualidade

O goberno local pecha o PAI por falta de nenos, mentres protesta pola xestión sanitaria que, segundo o PP, a Xunta si está a cumprir

O Partido Popular de Trabada condenou o que consideran unha “hipocrisía” por parte do goberno local do PSOE, despois de que este decidise pechar o Punto de Atención á Infancia (PAI) por non haber suficientes nenos para manter o servizo. A formación popular critica que, mentres o PSOE local protesta pola prestación do servizo de Atención Primaria, o centro de saúde de Trabada conta coa praza de médico que lle corresponde segundo a ratio de poboación, cumprindo así coa normativa establecida pola Xunta de Galicia.

José María Fernández, voceiro do PP de Trabada, lamentou a situación, sinalando que “todos desexamos ter máis médicos e mellores servizos públicos, e o PP de Trabada sempre loitará para que isto sexa así”. Fernández subliñou que, malia a escaseza de profesionais sanitarios que afecta a todo o país, a Xunta está a facer un “gran esforzo” para manter o persoal nos centros de saúde, especialmente nas zonas rurais como Trabada.

O PP insta ao PSOE local a dirixirse ao Goberno central, liderado por Pedro Sánchez, para reclamar unha solución á falta de médicos que afecta a todas as comunidades autónomas. Fernández sinalou que a medida máis efectiva sería aumentar as prazas MIR para poder formar máis médicos de Atención Primaria.

“A falta de médicos é un problema estatal, non exclusivo de Galicia”, remarcou Fernández, lembrando tamén que o Goberno central non facilita a contratación de máis profesionais sanitarios. Criticou, ademais, que cando a Xunta propuxo medidas para paliar a situación —como a Lei de medidas extraordinarias para postos sanitarios de difícil cobertura—, PSOE e BNG votaron en contra no Parlamento galego en outubro de 2022.

Plan de cobertura de verán

Para afrontar a escaseza de médicos, a Xunta puxo en marcha o Plan de cobertura de necesidades de persoal médico en Atención Primaria durante o verán, cun investimento de 12,5 millóns de euros. O plan inclúe medidas ordinarias e extraordinarias para garantir a calidade da asistencia sanitaria en toda Galicia, a pesar das dificultades que impón a falta de persoal.