O PP de Burela reclama medidas contundentes contra a okupación
O Partido Popular de Burela vén de solicitar ao executivo municipal bipartito que lidera a alcaldesa López Moreno que manifeste publicamente o seu rexeitamento á okupación ilegal de vivendas e á denominada inquiokupación, así como que inste ao Goberno de España a revisar e derrogar a actual Lei estatal de Vivenda. A formación considera necesario aplicar, cando menos, as medidas recollidas na Lei Orgánica 1/2025, que prevé actuacións máis rápidas e novos recursos para a Xustiza co obxectivo de erradicar este tipo de prácticas e garantir seguridade xurídica aos propietarios. Tamén propoñen a creación de xulgados especializados.
Desde o grupo popular subliñan que a okupación ilegal de inmobles “é unha preocupación crecente en toda España” e que, nos últimos meses, numerosos casos comezan tamén a aparecer na comarca e, en particular, en Burela.
A organización defende “o dereito constitucional á propiedade privada” e expresa o seu apoio “a todas as persoas afectadas, que viven con frustración e indefensión unha situación que non debería producirse sen unha resposta legal máis contundente”.
Por este motivo, o PP presentará ante o Pleno municipal unha proposta para impulsar acordos que permitan combater tanto a okupación ilegal como a chamada inquiokupación, situación que se produce cando un inquilino deixa de pagar o alugueiro pero continúa habitando a vivenda.
Os populares lembran que teñen impulsado no Congreso dúas iniciativas lexislativas centradas en medidas como a posibilidade de efectuar desafiuzamentos nun máximo de 24 horas ou autorizar aos propietarios a cortar subministracións básicas —como a luz ou a auga— cando a vivenda está okupada ilegalmente.
Porén, denuncian que estas propostas permanecen paralizadas polos votos de PSOE, Sumar e outros grupos da esquerda, incluído o BNG, aos que acusan de manter unha regulación que “permite e favorece” episodios de okupación.