O PP de Burela pide solucións urxentes para mellorar accesos e servizos en Os Cotos, Ril e A Casilla
O Partido Popular de Burela trasladou formalmente ao goberno bipartito presidido por López Moreno un paquete de demandas veciñais relativas ás melloras pendentes nas zonas de Os Cotos, Ril e o barrio da Casilla. Segundo sinalan, trátase dunha proposta realizada “con ánimo construtivo” e en resposta ás peticións reiteradas dos residentes.
Un dos asuntos que máis preocupa é a recente colocación dun sinal de dirección prohibida no acceso que conecta Os Cotos con Ril. Esta vía, empregada en dobre sentido durante máis de 25 anos sen rexistrar incidentes, pasou a ser de sentido único, dificultando o acceso ás vivendas e obrigando a realizar longos rodeos. Os populares lembran que o propio plan urbanístico municipal recolle a necesidade de ampliar este camiño, polo que solicitan que se reconsidere a medida e se restableza, de forma provisional, a circulación en ambos sentidos ata que se execute a ampliación.
Ademais, reclaman que esta actuación sexa incluída con carácter prioritario no plan de obras municipais, xa que consideran que se trata dunha medida “lóxica, asumible e avalada polo uso histórico da vía e polo consenso da veciñanza”.
Outro dos puntos destacados da proposta é a revisión urxente do funcionamento da estación de bombeo de augas residuais da Casilla. Os populares advirten de que, en episodios de fortes choivas, prodúcense verteduras incontroladas a fincas privadas e mesmo cara á praia de Ril, o que supón un evidente risco medioambiental.
Tamén reclaman a construción de beirarrúas en ambos sentidos da rúa parcialmente urbanizada, co obxectivo de garantir a seguridade peonil e unha accesibilidade mínima acorde cunha zona residencial.
Desde o PP insisten en que estas demandas “non responden a criterios partidistas, senón ao sentido común e á defensa de dereitos básicos como o acceso digno ás vivendas e a protección do contorno natural”. Os concelleiros populares lembran, ademais, que trasladaron estas necesidades aos deputados provinciais do partido durante unha recente visita a Burela, na que tamén puxeron en valor “as bondades do pobo cando está ben xestionado”.