O PP de Burela acusa ao goberno local de bloquear as súas propostas no pleno municipal
O Grupo Municipal do Partido Popular de Burela cargou con firmeza contra a actitude do executivo local, ao que acusan de “opoñerse sistematicamente a todas as propostas do PP, mesmo cando están pensadas para mellorar a vida da veciñanza”. Os populares aseguran que, no pleno deste mes, volveron atoparse cun “veto constante” por parte da alcaldesa e do Grupo Socialista.
Entre as mocións defendidas polo PP figuraba unha iniciativa para que o Concello asumise plenamente as competencias recollidas na Lei de Benestar Animal. A proposta incluía actualizar os protocolos municipais e asumir gastos asociados á xestión das colonias felinas —como esterilizacións, alimentación ou atención continua para animais perdidos— co obxectivo de garantir, segundo explicaron, “un trato equitativo entre todos os sectores da poboación”. “Non pode ser que existan diferencias no acceso ás axudas municipais; é un criterio pouco xusto e nada equilibrado”, expuxeron os concelleiros.
A segunda das propostas do PP buscaba que o Concello fixase unha posición clara fronte ás okupacións ilegais de vivendas. A este respecto, os populares amosaron a súa disconformidade coas emendas do Grupo Socialista, que sostivo que este fenómeno non representa un problema relevante no municipio. Pola contra, desde o PP afirmaron que “si existen casos de inquiokupación en Burela e incluso hai clans organizados que promoven este tipo de prácticas”.
Os concelleiros populares lamentaron que, ao seu xuízo, o goberno municipal “mire cara outro lado e non queira asumir unha realidade que afecta a veciños concretos do noso pobo”. Engadiron ademais que “votar en contra dos problemas dunha parte da cidadanía é gobernar só para unha parte do municipio”, reprochando ao executivo local a falta de apoio ás súas iniciativas.