O PP de Barreiros afea a Ermida que non se preocupara de que se levara auga ao centro de saúde durante o corte do abastecemento
A rede de subministro de auga de Barreiros sufriu esta mañá unha rotura, cuxa reparación esixiu cortar o abastecemento a unha zona da vila, dentro da que se atopa o centro de saúde. O corte prolongouse entre as oito da mañá e as 15.00 horas.
O portavoz popular, José Manuel Gómez Puente, sinala que en calquera momento se pode producir unha avaría nunha rede de distribución de auga e a conseguinte reparación esixe cortar o subministro. Pero afea ao goberno local, e concretamente á alcaldesa, Ana Ermida, "que non contactara co centro de saúde para ver a maneira de cubrir temporalmente a falta de abastecemento". Gómez Puente anuncia a presentación dunha iniciativa na próxima sesión plenaria en relación con este asunto.
O portavoz popular sinala: “Calquera entende que se produza unha avaría. O que non entende o persoal do centro de saúde é que o Concello e sinaladamente a alcaldesa non preguntaran como podían cubrir a falta de auga, que, nun servizo como este, é necesaria para lavar as mans entre paciente e paciente, para efectuar o traballo, etcétera. A verdade é que se botou de menos que dende o goberno local se pregunta que se necesitaba no centro de saúde”.
Para facer fronte á falta de abastecemento de auga, os traballadores do centro de saúde conseguiron varias garrafas para dispoñer da necesaria para lavar as mans, como mandan os protocolos sanitarios, e usala nos casos precisos na atención aos pacientes.
“Ninguén do Concello nos preguntou nada -di Gómez Puente- e, a verdade, cremos que non é a forma correcta de actuar. Coa iniciativa que presentaremos na próxima sesión plenaria, esperamos conseguir que, se se dá outra situación así, o Concello se preocupe de subministrar auga ao centro de saúde, como é a súa obriga, porque o abastecemento é unha das funcións básicas dos concellos”.
