O PP critica o estado da estrada LU-P-0602 e acusa á Deputación de Lugo de inacción
O Partido Popular volveu cargar contra a Deputación de Lugo e o goberno municipal de Barreiros polo estado da estrada provincial LU-P-0602. Segundo o voceiro do Grupo Provincial Popular, Antonio Ameijide, "a situación desta vía é alarmante e segue sen recibir ningún tipo de mantemento por parte do PSOE e do BNG na Deputación".
Ameijide, acompañado polo deputado provincial José María Fernández e polo portavoz local do PP, José Manuel Gómez Puente, visitou a estrada para comprobar o seu estado. Desde o seu punto de vista, "o seu deterioro agravouse nos últimos meses debido á falta de limpeza das cunetas, o que provoca que a auga da choiva se acumule sobre a calzada". O PP asegura que os baches superan os 20 centímetros de profundidade e que xa hai vehículos danados, o que cualifican de "grave risco para a seguridade viaria".
Os populares tamén responsabilizan directamente á alcaldesa de Barreiros, Ana Ermida, e ao deputado provincial Daniel García, quen, segundo din, "teñen capacidade para buscar unha solución pero levan máis dun ano sen facer nada". Para o PP, a falta de actuación nesta estrada "é un reflexo do escaso apoio da Deputación ao sector primario", pois a vía serve de acceso a explotacións gandeiras.
Ademais, sosteñen que o mal estado das vías provinciais tamén prexudica o turismo. "Camiño das praias, os visitantes atópanse cunha estrada chea de fochancas, que dá unha imaxe lamentable do noso concello", concluíu Ameijide.