O porto de Viveiro estrea iluminación máis eficiente cun investimento de 95.000 euros
O porto de Viveiro dá un paso máis cara á eficiencia enerxética cunha actuación de mellora do seu sistema de iluminación exterior. Esta semana están en marcha as obras promovidas pola Consellería do Mar, a través de Portos de Galicia, para a substitución de 54 luminarias e proxectores por equipos LED de altas prestacións, nun proxecto que supón un investimento de 95.000 euros.
Os traballos inclúen non só a retirada das antigas instalacións e a colocación de novos equipos, senón tamén a implantación dun sistema de telexestión que permitirá regular o alumeado de forma remota, adaptándoo ás necesidades do espazo portuario en cada momento. Segundo Portos de Galicia, esta modernización suporá un aforro enerxético de ata o 60% e reducirá a contaminación ambiental e luminosa, sen comprometer a seguridade nin a visibilidade nas instalacións.
Esta actuación forma parte dun plan autonómico máis amplo que contempla a renovación da iluminación exterior en arredor dunha trintena de dársenas galegas ao longo deste ano. En total, destinaranse 3 millóns de euros para dotar o sistema portuario autonómico de tecnoloxía sustentable.
No caso concreto de Viveiro, a intervención permitirá mellorar substancialmente a comodidade visual dos traballadores e usuarios do porto, ao tempo que se reforzará a seguridade mediante sistemas de protección contra sobretensións. A nova infraestrutura está deseñada especificamente para soportar condicións ambientais complexas como a humidade, a salitre e as variacións climáticas propias do entorno mariño.
Con esta renovación, o porto viveirense sitúase na vangarda en materia de eficiencia e sustentabilidade, sumándose aos esforzos da Administración autonómica por modernizar as infraestruturas portuarias de Galicia con criterios ambientais e tecnolóxicos avanzados.