O porto de Ribadeo acolleu unha nova visita de embarcacións bretoas nun intercambio co sabor do mar e da irmandade
Ribadeo volveu ser porto de benvida para os irmáns bretoas. O pasado mércores 11 de xuño, tres barcos veleiros e un catamarán chegaban ao porto deportivo procedentes de Loktudi, vila bretoa irmandada con Ribadeo desde hai máis de vinte anos. A súa estancia prolongouse ata o domingo 16, tempo no que os tripulantes foron acollidos e acompañados por membros da Asociación Irmandade Ribadeo-Loktudi.
Durante a súa visita, os navegantes bretoas non só gozaron da hospitalidade ribadense, senón que tamén recibiron apoio técnico para resolver unha avaría nunha das embarcacións, que perdera o mastro no medio do Golfo de Biscaia. Grazas á colaboración da asociación e da comunidade local, puideron xestionar a incidencia e continuar a súa travesía con seguridade.
Os días en Ribadeo deron para moito máis que reparacións. Os membros da asociación anfitrioa fixeron de guías e mostraron aos visitantes os lugares máis destacados do casco histórico e da contorna, nunha experiencia cultural e humana que reafirma a amizade entre ambas comunidades.
A despedida tivo lugar o domingo cun pequeno convite, cargado de emocións e promesas de reencontros. De feito, xa está prevista unha nova viaxe de retorno: do 1 ao 9 de xullo, membros da asociación ribadense viaxarán a Loktudi para continuar fortalecendo esta ponte de irmandade que une Galicia e Bretaña a través do mar.
Desde a organización lembran que aínda queda algunha praza dispoñible para quen queira sumarse a esta experiencia intercultural. As persoas interesadas poden solicitar máis información no teléfono 629 47 52 99.