O Porto de Celeiro impulsa a conciencia ecolóxica do alumnado cun certame de relatos e actividades educativas
A Organización de Produtores Pesqueiros do Porto de Celeiro (OPP-77) renova un ano máis a súa colaboración co CEIP de Celeiro para fomentar entre os máis novos o respecto polo medio ambiente e os valores dunha pesca sostible. Coincidindo co Día Mundial do Medio Ambiente, o Día Internacional da Loita contra a Pesca Ilegal e o Día dos Océanos, a entidade impulsa unha nova edición da súa campaña “Coidamos do planeta”, que nesta ocasión inclúe un certame de relatos e dúas actividades educativas pensadas para o alumnado de 5º e 6º de Primaria.
O concurso, que admite traballos en formato escrito ou gráfico, terá como temática central o mundo mariño, a pesca e a sustentabilidade ambiental. O prazo para participar abrirase o 5 de xuño, coincidindo co Día do Medio Ambiente, e estenderase ata o 13 do mesmo mes. As bases estarán dispoñibles nas webs da OPP-77 (www.puertodeceleiro.es) e do propio centro educativo (www.edu.xunta.gal/centros/ceipceleiro). Os traballos serán avaliados por un xurado composto por representantes da organización pesqueira e do colexio, que anunciará os gañadores nas categorías de técnica e orixinalidade o 18 de xuño. A entrega de premios celebrarase o día 26 e o CEIP de Celeiro recibirá un lote de libros como agradecemento pola súa implicación.
Paralelamente, e dentro das accións do Plan de Produción e Comercialización (PPyC) da OPP-77, o 5 de xuño tamén se desenvolverán no centro dúas actividades didácticas conxuntas: un obradoiro de cociña saudable e unha xincana temática. A través destas propostas, a organización pretende achegar ao alumnado os beneficios dunha alimentación equilibrada baseada en produtos do mar e os fundamentos dunha actividade pesqueira respectuosa co entorno.
Na sesión culinaria, os nenos e nenas aprenderán a preparar unha receita saudable con pescada de Celeiro como ingrediente estrela. A actividade permitiralles descubrir as diferentes partes do peixe, as súas propiedades nutricionais, consellos para recoñecer a frescura do produto e técnicas básicas de elaboración.
A continuación, os estudantes participarán por grupos na chamada “xincana pesqueira sostible”, un percorrido con probas que combinan habilidades físicas, memoria e traballo en equipo. A través desta dinámica lúdica, simularase o traballo das tripulacións da OPP-77, amosando como se desenvolve un modelo de pesca responsable e eficiente que garante a chegada a terra dun produto de calidade.
Con esta nova iniciativa, o Porto de Celeiro reafirma o seu compromiso coa educación ambiental e a sensibilización das novas xeracións, apostando por fórmulas amenas e participativas para transmitir o valor do mar e a importancia de coidalo.