O Porto de Celeiro acollerá tres novos módulos de formación dirixidos a traballadores do mar
O Porto de Celeiro acollerá tres novos módulos de formación dirixidos a traballadores do mar en materia marítimo-pesqueira. Estas actividades, organizadas pola Secretaría Xeral de Pesca, nas que participarán máis de 150 persoas, impartiranse do 16 ao 20 de outubro.
Paralelamente, prográmanse visitas técnicas e un curso para alumnos de Formación Profesional no ámbito de motores. Deste xeito, o Ministerio de Agricultura, Pesca y Alimentación continúa coa súa aposta pola formación marítimo-pesqueira a bordo do buque de cooperación pesqueira Intermares.
Os traballadores poderán adquirir coñecementos relacionados coas boas prácticas na manipulación, procesado e conservación dos produtos pesqueiros. Grazas á formación, os participantes poderán aplicar e transferir os coñecementos adquiridos ao seu ámbito de traballo, de maneira que aseguren a obtención de produtos inocuos e sometidos ao tratamento óptimo para alcanzar a máxima calidade do produto.
Pola súa parte, os estudantes de Formación Profesional realizarán o curso de Patrón de Litoral no que completarán a teoría cunha parte práctica no buque auxiliar do Intermares. Con estas propostas, o Ministerio fomenta a formación integral en actividades relacionadas con este sector, a través da aprendizaxe e da especialización. Un dos principais obxectivos destas actuacións é favorecer o relevo xeracional, un dos grandes retos para a actividade pesqueira e acuícola.
A formación financiase a través do Plan de Recuperación, Transformación e Resiliencia (PRTR) e para o Ministerio constitúe unha garantía de futuro, ao formar profesionais cualificados na xestión e avaliación de recursos, que é un dos principais piares para a xestión pesqueira sostible.